O Chanfaina deste ano desenvolverase desde o xoves 1 ata o domingo 4, de maneira que gana un día con respecto ás pasadas edicións ao tempo que amplía o seu catálogo de actividades con máis proxeccións e un apartado formativo/colaborativo específico. A lista de asistentes está practicamente confirmada e reunirá xente de aquí á que lle tira iso de contar con imaxes e tamén xente de fóra con longa traxectoria e reputación no mundo audiovisual.
Entre eles e elas atoparemos nomes autóctonos coma o de Fran Bermúdez, Abel Vega, Bieito Beceiro, Pablo Martínez, Roberto Bouza ou Sebastián Rodríguez, ademais dos de Patricia Lamas, David Anca e Miguel Sanjurjo -integrados en ConSuma Conciencia-, o modestino Dani Ferreira e outros que poidan sumarse ao proxecto nos días que faltan.
Os realizadores e realizadoras confirmadas de “fóra de portas” que afrontarán o reto de filmar un territorio descoñecido para a maioría -parte deles repiten- teremos a Ángeles Huerta, a Beatriz del Monte, a Carla Andrade, a Claudia Brenlla, a Eloi Domínguez, a Lara Bacelo, ás irmás xemelgas Lara e Noa Castro, a Lois Patiño, a Marcos Lourido, a Marta Piñeiro, a Natalia Porca (de Narón pero con raíces en Igrexafeita), a Pablo Millán, á pontesa Sabela Pernas e ao recentemente premiado co Goya á mellor montaxe por “El Desconocido”, Jorge Coira.
Todos e todas convivirán durante a primeira fin de semana do mes que entra compartindo a experiencias e a experiencia en si que é captar con tempo escaso a esencia de San Sadurniño retratando xente, paisaxes, e historias que, máis adiante, cando se monten e se proxecten, comporán un totum revolutum de visións a imaxe e semellanza do prato típico que lle dá nome ao encontro.
Calquera persoa ou entidade que queira sumarse ao proxecto cunha peza ou botando unha man na produción dalgunha curta -axudándolle a outros realizadores e realizadoras, facendo de guía ou contándolles cousas interesantes que poidan converterse nun audiovisual- pode facelo contactando directamente coa organización no teléfono 616 016 793.
O Chanfaina Lab está organizado polo Concello e é unha iniciativa impulsada polo académico do audiovisual Manolo González como proxecto paralelo a Fálame de San Sadurniño, a web á que moitos creadores e creadoras acoden para buscar material e inspiración sobre as historias que contarán despois. Na edición de 2016 tamén colabora a Deputación da Coruña.
PROGRAMA
XOVES 1
20.00h.- Casa da Cultura: Proxección dos filmes documentais “A Seara”, de Pepe Coira, e “Verengo”, de Víctor Hugo Seoane. Pezas unidas polo eixo temático común de recolleren a realidade de dúas aldeas da montaña interior galega.
VENRES 2
10 a 14.00h.- Aula CeMIT: “Retrata San Sadurniño: son de aquí, miro así”.
Ana Seijo e Sabela Pernas (Videodinamizarte), traballarán sobre creatividade, dinámicas de grupo e técnicas básicas de gravación e realización. A iniciativa ten como obxectivo obxectivo que as persoas participantes desenvolvan conxuntamente a súa propia peza para proxectala o domingo durante a clausura do encontro. O obradoiro é gratuíto e ás persoas participantes, ademais de consellos prácticos, tamén se lles facilitará material de gravación. Desenvolverase desde as 10 ás 14.00h. e para inscribirse é necesario pasar pola Aula CeMIT ou chamar ao 616 016 793.
20.00h.- Aula CeMIT: Recepción de participantes e visita á Casa do Concello. Apertura na galería do pazo da exposición fotográfica “A propósito da Chanfaina”, con instantáneas das anteriores edicións captadas polo fotoxornalista Gabriel Tizón (aberta durante todo o mes)
21.15h.- Casa da Cultura: Presentación do proxecto “Visións”, nacido no marco do programa Cinema e Muller da Deputación de Pontevedra. Unha iniciativa que busca reivindicar o papel feminino na creación audiovisual e da que saiu un filme colaborativo executado a base de curtas por dez realizadoras. Proxectaranse Ambos mundos (2016) de Claudia Brenlla, Aquí dentro (2016), de Lara Bacelo e Listen to Me (2016), de Carla Andrade. As tres participan no Chanfaina Lab.
SÁBADO 3
9.00 a 14.00h.- Produción e gravación de curtametraxes
14.30h. a 15.30h.- Xantar para participantes no local social de Bardaos, en colaboración coa Confraría do San Pipote
15.30h. a 21.00h.- Produción e gravación de curtametraxes
21.00h.- Casa da Cultura: Eira de Cineastas, coa proxección dunha escolma de pezas producidas polos creadores e creadoras convidadas nesta edición:
- Quixera, Fran Bermúdez, 2016
- O segredo, Ángeles Huerta, 2016
- Autarquía, Escravo e Fernando VII, Lara e Noa Castro, 2016
- Montaña en sombra, Lois Patiño, 2012
- Fatum, Pablo Millán, 2010
- 1664.Toma de posesión de Bernardino de Andrade, Bieito Beceiro,2016
- Home, Beatriz del Monte, 2015
- Materia Prima, Natalia Porca, 2016
- Logo chega o día, Jorge Coira, 2010
- Amancio Sigfredi, futbolista actor porno, Con suma conciencia, 2015
- No novo céio, Eloi Dominguez Serén, 2014
- O pozo de Lamas, Abel Vega, 2014
- Pequeñas sombras humanas, Marcos Lourido, 2014
- As doce, Marta Piñeiro, 2015
- Aquí e agora, Sabela Pernas, 2016
DOMINGO 4
10.00h. a 14.00h.– Gravación de curtametraxes
10.00h. a 14.00h.- Aula CeMIT: Montaxe da peza colaborativa “Retrata San Sadurniño: son de aquí, miro así”
14.30h. a 15.30h.- Xantar para participantes no local social da A.VV. Adiante de Igrexafeita
15.30h. a 19.00h.- Gravación de curtametraxes
19.00h.- Casa da Cultura: Proxección da curta producida dentro do obradoiro de Videodinamizarte e despedida de participantes no III Chanfaina Lab