O departamento municipal de Igualdade publicou o venres no tablón de anuncios do Concello a resolución da alcaldía co listado provisional de nenas e nenos admitidos na Aldea de Verán 2026, que comeza o próximo 1 de xullo. Na relación figuran todas as solicitudes admitidas para a primeira quenda -a de xullo- e tamén a para as da segunda, a de agosto. As familias que detecten calquera erro ou que non figuren no listado malia teren solicitado o servizo teñen tres días hábiles para presentar calquera tipo de alegación (ata este xoves 25 de xuño, incluído). Superado ese período, e unha vez resoltas as posibles alegacións, a relación de solicitudes elevarase a definitiva e as familias terán outros tres días para efectuar o pagamento do servizo. Cómpre lembrar, ademais, que o luns 29 de xuño abrirá un novo prazo de solicitude só para o mes de agosto.
O Concello recibiu un total de 43 solicitudes, moitas delas dobres (para xullo e agosto): 33 correspondentes a rapazada empadroada en San Sadurniño, outras 5 pertencentes a familias con vinculación laboral no noso concello, unha dunha crianza matriculada no CPI e outra petición sen ningún tipo de vinculación con San Sadurniño. Do cómputo total quedarían fóra tres peticións recibidas.
Así as cousas, para a quenda de xullo foron admitidas 40 nenas e nenos e para a de agosto preadmitíronse 19 solicitudes que agora deberán ser confirmadas mediante o pagamento do servizo, algo que as familias deberán efectuar unha vez que saia publicada a lista definitiva de admisións, non antes. Os prezos en vigor para este ano son os seguintes:
| Horario de 8:00 a 15:00h | Horario de 9:00 a 15:00h | |
|---|---|---|
| 1º membro da familia | 110 € / 99 €* | 80 € / 72 €* |
| 2º membro da familia | 75 € / 68 €* | 50 € / 45 €* |
| 3º membro da familia | 45 € / 41 €* | 30 € / 27€* |
(*) Prezo con bonificación, previa solicitude e sempre que se cumpran os requisitos.
Trala publicación do listado provisional de admisións na Aldea de Verán, o Concello dá tres días hábiles -contados desde este luns 22, incluído- para presentar alegacións. O último día para rexistralas presencialmente ou pola Sede Electrónica será, polo tanto, este xoves 25 de xuño, dado que o 24 é festivo.
O 29 abre o segundo prazo de solcitudes
Se non hai alegacións, a lista definitiva de admisións para xullo e preadmisións para agosto elevarase a definitiva xa o venres.
De acordo co listado provisional, para o segundo mes do campamento de verán aínda quedarían dispoñibles, en principio, 16 vacantes. Eses sitios libres na quenda de agosto poderán solicitarse entre as 09:00h do día 29 de xuño e as 14:00h do 10 de xullo, ben presencialmente ou ben a través da Sede Electrónica Municipal, onde figura o procedemento específico que estará activo durante ese período.
A Aldea de Verán estará xestionada este ano por Servicios Deportivos Galicia S.L. (SEDEGA), quen se impuxo no procedemento de licitación a outras dúas empresas do sector. A firma naronesa presentou a segunda mellor oferta económica -16.775 €- e a súa proposta técnica obtivo a maior puntuación das propostas recibidas.
Folla de información xeral
Ficha de solicitude
Folla de autorización de representación
