Axudas en concorrencia competitiva para o ano 2025 da Liña 2.1. PEL Emprende Investimento a través do apoio ao investimento en bens inventariables. A finalidade destas axudas é contribuír á consolidación e ao fortalecemento do tecido empresarial nos concellos da provincia da Coruña con poboación inferior a 10.000 habitantes a través do apoio ao investimento en bens inventariables de pequenas, medianas empresas, microempresas e persoas autónomas en calquera das modalidades xurídicas existentes.
Persoas beneficiarias: Pequenas, medianas empresas, microempresas e persoas autónomas, promotoras de iniciativas empresariais que estean desenvolvendo unha actividade con ánimo de lucro.
Gastos subvencionables: Terán a consideración de gastos subvencionables dentro desta liña, aqueles gastos que resulten estritamente necesarios para o desenvolvemento da/s actividade/s dada/s de alta no Certificado de situación censual tido en conta no acto de concesión e que se atopen dentro dos seguintes códigos de concepto de gasto:
| Conta | Descrición da conta |
| 206 | Aplicacións informáticas
Nesta conta considerarase exclusivamente o importe satisfeito pola propiedade ou polo dereito ao uso de programas informáticos adquiridos a terceiros. |
| 213 | Maquinaria
Conxunto de máquinas ou bens de equipo mediante os cales se realiza a extracción, elaboración dos produtos ou prestación de servizos. |
| 216 | Mobiliario
Mobiliario, material e equipos de oficina, coa excepción dos que deban figurar na conta 217. |
| 217 | Equipos para procesos de información
Computadores e demais conxuntos electrónicos. |
Con carácter xeral, quedan expresamente excluídas en todos os conceptos contables as instalacións, os mantementos, portes, obras, reformas, reparacións, cubertas, carpas, alugueres, rotulacións, instalacións técnicas de climatización, iluminación ou telecomunicacións, páxinas web, hosting, dominios, mantementos das aplicacións informáticas, fundas de elementos subvencionables, protectores de pantalla, subscricións anuais, canóns, elementos de transporte, material funxible, prendas textís, artigos de decoración, espellos, televisores, reloxos intelixentes, elementos de iluminación, aparellos de climatización, sistemas de seguridade, telefonía, teléfonos móbiles, routers e aspiradores de limpeza.
Período subvencionable: Os investimentos subvencionables serán aqueles realizados entre o 1 de xaneiro e o 31 de decembro de 2025.
Prazo de solicitude: do 17/02/2025 ás 09 :00 horas ata o 17/03/2025, ás 14 :00 horas.
Cantidade: As entidades poderán presentar un orzamento mínimo de gasto* de 3.500,00 € e un máximo de 25.000,00 €, do cal poderán solicitar, como máximo, o 70%.
*No orzamento do gasto considerarase excluído o IVE no caso de que sexa susceptible de recuperación ou compensación pola entidade.