O Fondo Galego de Cooperación e Solidariedade, do que forma parte San Sadurniño xunto con outros 87 concellos e as deputacións de Lugo e A Coruña, vén de unirse á Alianza Europea de Redes Locais de Cooperación Internacional canda outras oito entidades integradas por municipios de distintas comunidades autónomas e de Italia, Holanda, Portugal e outros países lusófonos. O obxectivo é desenvolver estratexias comúns para contribuír á consecución dos Obxectivos de Desenvolvemento Sostible (ODS) fixados pola ONU para loitar contra a pobreza e as desigualdades.
Fomentar a aprendizaxe mutua entre as distintas redes municipalistas dedicadas á cooperación a través do intercambio de experiencias, mellorar a articulación entre elas e fomentar a creación doutras, así como dialogar coa Comisión Europea e outros organismos internacionais para implementar iniciativas comúns a prol dos ODS son algúns dos obxectivos da nova alianza constituída en Lisboa.
Alén do Fondo Galego, forman parte o Fondo Andaluz de Municipios para la Solidaridad Internacional, o Fondo Extremeño Local de Cooperación al Desarrollo, o Fondo de Entidades Locais para a Cooperación Descentralizada (Umbria), o Fondo Provincial Milanés para a Cooperación Internacional, a Federación Italiana das Redes Territoriais para o Desenvolvemento, o Consello Nacional para Parcerías das Cidades entre Países Baixos e Nicaragua (LBSNN), a Rede Intermunicipal de Cooperação para o Desenvolvimento, e a União das Cidades Capitais de Língua Portuguesa.
A vicepresidenta do Fondo Galego e concelleira en Redondela, Teresa París, foi a encargada de asinar o acordo no marco do Seminario Internacional ‘Autoridades locais rumbo a 2030: diálogos para o desenvolvemento’, ao que asistiu a finais da semana pasada canda o mediador intercultural do Concello de Ames, Leonardo Pena, e persoal da Secretaría Técnica. O Fondo Galego foi convidado a presentar as súas boas prácticas en materia de comunicación para o desenvolvemento, que espertaron especial interese entre participantes de Estremadura, Italia e Alemaña.
Representantes da Comisión Europea, do Programa de Desenvolvemento das Nacións Unidas, de gobernos nacionais e locais, das ONGD, do mundo académico e do sector privado déronse cita na capital lusa. O evento ecadrábase na segunda fase do proxecto europeo Redes para o Desenvolvemento, centrada na promoción da educación para a cidadanía global, onde o Fondo Galego participa canda o Instituto Marquês de Valle Flôr, os municipios tamén portugueses de Loures e O Seixal, a ONGD alemá Fine+p e a fundación holandesa LBSNN. Dentro deste proxecto xa se organizara un foro internacional en Pontevedra e o Fondo Galego tamén actuara como referente na promoción das redes de cooperación descentralizada durante a primeira fase.
Imaxes con fondo
En relación coa actividade do Fondo Galego de Cooperarción e Solidariedade cómpre lembrar que a entidade mantén aberto o prazo de presentación de traballos para o certame Imaxes con fondo, que nesta terceira edición presenta como novidades a sección de vídeo que se suma á habitual de fotografía e coa interculturalidade como temática central.
O prazo para presentar obras a concurso prolongarase ata o 15 de novembro. Neste tempo, dez concellos socios do Fondo Galego acollerán obradoiros de fotografía social. Ademais, o evento en Facebook tamén será punto de encontro no que propor ideas e reflexións sobre o papel da fotografía e o audiovisual. O certame ten dúas categorías, xuvenil e adulta, dotadas cada unha delas con tres premios. No caso da categoría adulta o ganador ou ganadora terá a oportunidade de viaxar a Mozambique e realizar alí unha reportaxe fotográfica ou videográfica coa axuda das entidades sociais do país que desenvolven proxectos en colaboración co FGCS.
O Fondo Galego
O Fondo Galego de Cooperación e Solidariedade está integrado por 88 concellos e as deputacións da Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido uns 150 proxectos en 30 países e promove numerosas actividades e materiais en relación aos desequilibrios Norte-Sur.
