Ao CF San Sadurniño xuntóuselle todo o choio durante esta fin de semana. E é que desde hoxe até o domingo, o campo dos Currás vai acoller o XX Torneo de Fútbol 8 no que se darán cita 36 equipos  da base comarcal. Todo un reto loxístico e organizativo ao que, ademais, se lle vai sumar o domingo ás 18:30h o partido de volta entre o equipo local e o Agrón-Barcala, no que será o cuarto e definitivo encontro da escuadra laranxa na súa loita polo ascenso a Primeira Futgal. O fútbol será, polo tanto, grande protagonista destes tres días que nos veñen, ao parecer, con moita calor e cunha alerta por altas temperaturas a partir da xornada do domingo. En calquera caso, ambas citas congregarán moita xente e moito movemento de vehículos nos arredores da piscina. Neste sentido, o Concello acondicionou unha grande zona de estacionamento nunha finca privada e tamén xestionou a colaboración da agrupación de Protección Civil de Neda. 

O torneo de Fútbol 8 disputarase con partidos a medio campo -dous encontros simultáneos- de un só tempo de 20 minutos na fase de grupos e de 25 minutos nas eliminatorias. A rolda empezará a xogarse hoxe venres a partir das 17:00h cos encontros dos oito equipos de prebenxamíns.  A semifinal entre o mellor do grupo A e o do grupo B xogarase ás 20:15h, e a final está prevista para as 21:00h.

O sábado será o día máis intenso, con partidos desde as 10:00h até pasadas as 22:00h. Durante a maior parte da xornada disputaranse os encontros de benxamíns, cun total de 16 equipos,  aínda que tamén se intercalará a fase de grupos A e B de alevíns co obxectivo de acelerar os tempos todo o posible de cara ao domingo, día no que o estadio dos Corrás deberá quedar libre para o partido de volta do CF San Sadurniño contra o Agrón-Barcala (outros anos o torneo de fútbol prolongábase até o serán do domingo).

O terceiro e último día do XX Torneo de Fútbol 8 de San Sadurniño tamén arrancará ás dez da mañá. En primeiro lugar xogarán os grupos C e D e, posteriormente, tocaralles aos encontros de cuartos, semifinais e a grande final, con hora prevista de inicio cerca das 15:00h. A liguiña alevín que se xogará entre a tarde do sábado e a mañá do domingo fórmana 12 equipos.

O Concello colabora co CF San Sadurniño na organización da grande cita futbolística abrindo a piscina de balde para a rapazada xa desde este venres e, ademais, tamén habilitou  un grande espazo de aparcamento nas inmediacións do campo de fútbol. Unha área que tamén axudará a desconxestionar o tráfico por mor do partido de playoff a Primeira Futgal entre o CF San Sadurniño e os amienses do Agrón-Barcala, para o que a Administración local solicitou, ademais, a axuda de Protección Civil de Neda.

O enfrontamento comezará ás 18:30h dunha tarde de domingo que se agarda ben calorosa en canto a clima -a AEMET anunciou a chegada da primeira vaga de calor do verán- pero tamén en canto a ambiente, xa que ambos equipos teñen posibilidades de subir de categoría, aínda que é o CF San Sadurniño quen parte con certa vantaxe despois de ganar na ida 0-1, ademais de xogar na casa.

O factor campo e o apoio da afección serán fundamentais para que o Sansa acade un resultado favorable que certifique un ascenso histórico. Por iso o Concello fai un chamamento a toda a veciñanza para encher o campo da piscina este domingo.