O Aldebarán-Intasa San Sadurniño regresa este sábado á Superliga Masculina, a máxima categoría do voleibol estatal, e farao diante da súa afección. O pavillón municipal acollerá ás 19:30 horas o encontro fronte ao Pamesa Teruel, correspondente á primeira xornada dunha competición na que participan doce equipos. O club chama a encher as bancadas para acompañar o conxunto local nesta nova andaina, cun primeiro obxectivo centrado na permanencia, pero tamén coa ambición de competir e facer un bo papel entre os mellores.
A volta á Superliga supón un novo fito para o club, que recupera o seu lugar na elite despois de lograr o ascenso a pasada tempada. A participación nesta categoría requiriu un importante esforzo deportivo, organizativo e económico, sobre todo na procura dos apoios necesarios para afrontar o reto. O presidente, Uxío García, explicaba en agosto nunha información de La Voz de Galicia que o primeiro obxectivo será asegurar a permanencia, aínda que tamén destacou o potencial do equipo para aspirar a bos resultados.
O adestrador, Manolo Berenguel, tamén lle explicaba hai uns días á prensa que unha das claves será “facernos fortes na casa e non dar nada por perdido”. O técnico considera fundamental converter o pavillón nunha pista difícil para os rivais, independentemente do seu nivel.
O primeiro exame será duro, xa que o Pamesa Teruel é un equipo con experiencia na categoría e chega ao inicio da liga despois dunha intensa pretemporada que no caso do Aldebarán estivo marcada por unha profunda renovación da plantilla, a adaptación dos novos xogadores e algunhas dificultades derivadas das lesións e das incorporacións tardías. O equipo, con todo, chega ao comezo da competición coa ilusión de volver medirse aos mellores e coa intención de facer valer o factor campo desde a primeira xornada.
Por iso, o club lanzou unha chamada directa á afección para que este sábado ás 19:30h se encha o pavillón municipal. A través das súas redes sociais, anima a veciñanza a achegarse, poñer voz ás bancadas e contribuír a crear ese ambiente que identifica o voleibol de San Sadurniño. A mensaxe non se limita ao partido contra o Teruel: o obxectivo é manter ese apoio durante toda a tempada, cando cada encontro na casa pode ser importante na loita pola permanencia.
A entidade tamén puxo en marcha a campaña de abonamentos para esta nova etapa. Os abonos son de 75 euros para persoas adultas, 30 euros para rapazada de entre 10 e 18 anos e 150 euros no caso do abono familiar, que inclúe dúas persoas adultas e dúas menores. As nenas e nenos de ata dez anos teñen entrada gratuíta. Existe ademais unha cota de socio de 30 euros que non inclúe o acceso aos partidos.
O alcalde, Secundino García Casal, quixo trasladarlle ao equipo os mellores desexos para esta nova andaina en Superliga que levará o nome do concello por distintos puntos do Estado. “Para un concello rural como San Sadurniño é todo un orgullo ter un equipo na máxima categoría do voleibol estatal. É máis, somos o municipio máis pequeno de toda a Superliga. Estar aí debe enchernos de fachenda e darnos aínda máis forza para apoiar o noso equipo”, sinalou o alcalde, lanzando un convite á veciñanza para ateigar o pavillón na reestrea deste sábado “e tamén durante o resto da liga”.
O Aldebarán continuará o calendario da Superliga a próxima fin de semana visitando a cancha do Conqueridor Valencia. Será a segunda xornada dunha competición longa na que é fundamental sumar puntos desde o comezo e aproveitar as oportunidades diante da afección. O club confía en que a resposta do público estea á altura do momento que vive o equipo, xa que volver á elite é un logro colectivo e o apoio das bancadas pode ser unha das claves para conseguir a permanencia.