A área municipal de Igualdade acaba de publicar no tablón de anuncios municipal o listado anonimizado de crianzas admitidas na quenda de agosto do programa educativo e de conciliación Aldea de Verán. Aceptáronse a totalidade das peticións, de maneira que serán 25 nenas e nenos as que participen na segunda parte do campamento. O listado permanecerá en exposición pública durante tres días hábiles, é dicir, desde hoxe até o venres. Dado que todas as solicitudes foron admitidas, o máis probable é que non se reciban alegacións e que o listado se eleve a definitivo automaticamente. As familias que non o fixesen aínda poderán formalizar daquela a matrícula.
Na lista figuran as referencias de 16 pequenas e pequenos con empadroamento en San Sadurniño ou con vinculación co municipio que van participar na Aldea de Verán durante xullo e agosto, xa que neses casos as familias puideron presentar a solicitude para os dous meses xa no mes de xuño.
A elas e eles súmanse agora outras 9 nenas e nenos que só asistirán no mes entrante: catro con empadroamento en San Sadurniño, dúas solicitudes que non pertencen a cativería de San Sadurniño pero que si está matriculada no CPI e, por último, outras tres que non teñen vinculación algunha co municipio, pero que tamén se admiten na Aldea de Verán por haber aínda prazas dispoñibles trala asignación preferente.
Tan pronto como o listado se eleve a definitivo, non antes, as familias deberán confirmar a matrícula no prazo dos tres días seguintes, aboando o importe que corresponda segundo as circunstancias e a modalidade de servizo elixida. Os prezos en vigor para este ano son estes:
| Horario de 8:00 a 15:00h | Horario de 9:00 a 15:00h | |
|---|---|---|
| 1º membro da familia | 110 € / 99 €* | 80 € / 72 €* |
| 2º membro da familia | 75 € / 68 €* | 50 € / 45 €* |
| 3º membro da familia | 45 € / 41 €* | 30 € / 27€* |
(*) Prezo con bonificación, previa solicitude e sempre que se cumpran os requisitos.
Na Sede Electrónica municipal figura un procedemento específico para tramitar as matrículas unha vez que a lista sexa definitva. Ademais tamén se poden consultar os documentos descargables nas seguintes ligazóns, incluída a propia relación provisionnal de admisións.
A Aldea de Verán é o programa socioeducativo e de conciliación estival promovido polo Concello de San Sadurniño a través da área municipal de Igualdade, co apoio económico do Plan Corresponsables. Gracias a este programa do Ministerio de Igualdade, o Concello recibiu unha achega de 14.535 euros, financiados nun 75% con fondos finalistas do Estado e nun 25% pola Xunta de Galicia.
Listado provisional Aldea de Verán agosto
Folla de información xeral
Ficha de solicitude
Folla de autorización de representación
