O Ministerio de Política Territorial está desenvolvendo a campaña “A Administración cerca de ti” deseñada para informar e axudar á veciñanza dos municipios rurais en todo o relacionado cos trámites electrónicos. Trátase dun programa de acompañamento no que se explicarán as vantaxes da Carpeta Cidadá, onde se recollen todos os servizos en liña que ofrece a Administración Xeral do Estado e onde, desde un único sitio, se poden facer xestións e consultar unha chea de datos, como por exemplo notificacións, os puntos do carné de conducir, as próximas datas da ITV, os títulos académicos, as propiedades inmobiliarias que se posúan, etc. Porén, o máis interesante da campaña “A Administración cerca de ti” é que durante as presentacións que se están levando a cabo por todo o país -en San Sadurniño o próximo 8 de marzo ás 11:30h na Casa da Cultura- as persoas asistentes poderán solicitar no momento o seu certificado electrónico, que serve para facer trámites sen moverse da casa coas administracións estatais, pero tamén co Concello, a Xunta, a Deputación e calquera outro organismo público.
As Administracións Públicas levan máis dunha década anunciando a inminente implantación da administración electrónica. Porén, esa implantación bateu con numerosos obstáculos, entre os que destacan a dispersión de sedes electrónicas con distintas características técnicas, a complexidade para acceder a elas se non se cumpren estritos requirimentos nos navegadores web, o feito de que moitas persoas -sobre todo as de maior idade- non posúen competencias informáticas básicas, a dificultade para ter boa conexión en zonas rurais e, quizais o máis relevante, o descoñecemento aínda xeralizado sobre como obter os certificados e chaves dixitais imprescindibles para efectuar trámites en liña acreditando indubidablemente e con total seguridade a identidade de quen fai a xestión, sexa en nome propio ou en representación doutra persoa.
Superar este último atranco é unha das finalidades principais da campaña estatal “A Administración cerca de ti”, posta en marcha como proxecto piloto polo Ministerio de Política Territorial. A primeira fase desta iniciativa estase desenvolvendo desde o pasado novembro nos concellos de entre 500 e 8.000 habitantes. O obxectivo da campaña tamén é dar a coñecer a Carpeta Cidadá da Administración Xeral do Estado e os servizos dispoñibles tanto na web como na aplicación móbil deste portal, o primeiro que concentra nun único punto a práctica totalidade de trámites e consultas que se poden facer perante os ministerios e outros organismos dependentes do Goberno estatal, ademais de estar conectado coas plataformas das comunidades autónomas e institucións adheridas.
Segundo o sitio, que ten versións en todas as linguas cooficiais, a Carpeta Cidadá “ofrece a posibilidade de comunicarte coas Administracións e ademais consultar as túas citas previas para realizar xestións, presentar escritos e solicitudes á Administración, acceder a trámites, consultar expedientes en curso ou finalizados, acceder ás túas notificacións pendentes e comparecer nelas ou recibir avisos e alertas”.
A carpeta ten unha versión aberta na que se describe todo o catálogo, estruturado en temas, das cousas que se poden facer a través dela -educación e formación, traballo e xubilación, saúde e asuntos sociais, situación persoal e familia, vehículos e transporte, vivenda, transparencia, notificacións, solicitudes, expedientes que teñamos abertos, etc.- e mesmo conta cun asistente virtual para facer múltiples consultas.
Porén, para entrar nela e empezar a facer xestións desde a casa fai falla dispoñer dunha clave ou un certificado dixital persoal e intransferible, que só se pode obter acreditando en persoa quen somos. Por exemplo, se queremos posuír o certificado dixital da Fábrica Nacional de Moneda y Timbre (o que vale para todo) hai que iniciar o trámite de solicitude na súa web e usando o ordenador no que posteriormente se vaia descargar e instalar o certificado por primeira vez. Despois hai que pedir cita previa nunha Oficina de Acreditación da Identidade -a que temos máis preto é a da Seguridade Social, en Ferrol-, achegarnos ata alí no día e na hora sinalados, presentar o DNI en vigor para que o funcionario ou funcionaria cotexe a nosa identidade e, feito isto, xa poderemos descargar e instalar o certificado. Un lío, en definitiva, incluso para persoas con coñecementos medios sobre normativa e informática.
Por iso dentro da campaña “A Administración máis cerca de ti” ofrecerase unha sesión informativa o mércores 8 de marzo a partir das 11:30h na Casa da Cultura na que poderemos solicitar no momento o noso certificado dixital de persoa física.
É importante non deixar pasar a charla polo que nela se nos vai explicar e, sobre todo, porque será unha boa oportunidade de conseguir o certificado dixital contando coa axuda de profesionais que nos ensinarán a usalo, así como todas as posibilidades que nos ofrece para facer trámites de maneira máis rápida e cómoda.
Para obter o certificado da FNMT é necesario acudir á charla levando o DNI en vigor e dispor dunha conta de correo electrónico para que nos envíen a ela o arquivo e o código de verificación, polo que tamén fará falla que as persoas interesadas poidan entrar no correo desde o móbil. Se non se ten correo electrónico pode levarse unha memoria USB para gardar nela o certificado. Unha vez o teñamos poderemos utilizalo na Carpeta Cidadá da Administración Xeral do Estado e nas sedes electrónicas de calquera organismo público, tamén na do Concello de San Sadurniño, da Xunta ou da Deputación.
