Noite de sorpresas esta do 26 de xuño de 2016. Unha vez máis queda demostrado que as enquisas serven de ben pouco. O resultado das eleccións a nivel estatal deixou claro que o Partido Popular lonxe de perder apoios recupéraos e que, en contra do que vaticinaban os sondeos, o PSOE baixa, pero non tanto, e Podemos e mailas súas confluencias non conseguen o sorpasso que a prensa daba como seguro hai tan só uns días.
Aquí en San Sadurniño os resultados son case un calco do ocorrido en España e en Galicia, aínda que con matices: o PP mellora porcentaxe con respecto á cita de decembro -catro puntos porcentuais máis-, o PSOE sobe o suficiente para converterse na segunda forza máis votada -case tres puntos máis- e, aquí vén a sorpresa local, a Marea, calcando porcentaxes (15,76%) -e tamén número de votos- con respecto a hai seis meses, queda como terceira forza por diante do BNG que daquela fora o segundo partido máis votado despois do PP pero que, desta vez, baixou sete puntos porcentuais.
Ciudadanos clava resultados en canto a número de votos en relación con decembro, 117, aínda que en porcentaxe sobe lixeiramente debido á baixa do censo que lle afecta tamén aos resultados do resto de partidos. Unha suba que contrasta coa evolución do partido a nivel estatal, xa que perdeu 8 escanos.
A abstención, outro dos grandes factores electorais, situouse en San Sadurniño nun 32,82%, dous puntos máis que en decembro. O cadro cos resultados mesa por mesa é o seguinte:
Censo: | 2.611 | Votos contabilizados: | 1.758 (67,33%) | Abst: | 859 (32,89%) | |
---|---|---|---|---|---|---|
Mesa | PP | PSOE | EN MAREA-PODEMOS | BNG-Nós C.G. | Ciudadanos | Outros |
S.Sadurniño | 217 | 102 | 123 | 47 | 38 | 17 |
Naraío | 94 | 60 | 46 | 54 | 30 | 11 |
Ferreira | 53 | 39 | 16 | 19 | 11 | – |
Lamas | 120 | 56 | 37 | 23 | 20 | 7 |
Santa Mariña | 135 | 36 | 14 | 14 | 3 | 4 |
Igrexafeita | 54 | 22 | 26 | 38 | 4 | – |
Bardaos | 89 | 19 | 12 | 19 | 11 | 7 |
Votos totais: | 762 (43,82%) | 334 (19,21 %) | 274 (15,76%) | 214 (12,31%) | 117 (6,73%) | 42 (prov.) |