A área de Igualdade do Concello de San Sadurniño xa ten lista a programación con motivo do 8M, Día Internacional da Muller. As propostas deste ano, dirixidas a todas as idades, estarán moi enfocadas na saúde das mulleres, así como na importancia do autocoñecemento e de coidármonos nós mesmas. E é que a saúde física, a saúde mental e a saúde emocional son fundamentais para ter unha vida plena e de calidade. Por iso é tan importante termos tempo para pensar nós, para aprender a recoñecernos, coidarnos a nós mesmas e poñernos diante e no centro das nosas vidas. Ademais, a programación municipal tamén reivindica, unha vez máis, que se valore e se visibilice como esencial o traballo de coidados que realizamos, xa sexa desde postos de traballo que recaen maiormente en mulleres -limpeza, servizos asistenciais, ensino, etc.-, ou o que facemos todas nós gratuitamente no fogar mirando da nosa xente, en especial das nosas persoas maiores.
Exposición de acuarelas de Saila Chao
Do 3 ao 28 de marzo – Casa do Concello
As obras que conectan o visible coa maxia das emocións, utilizando a acuarela como principal medio de expresión.
Manifesto e colgado de mandís
7 de marzo – 11:30 – Casa do Concello
Acto simbólico reivindicando o traballo de coidados que realizamos as mulleres nas profesións feminizadas e gratuitamente nas nosas casas.
Fala-Obradoiro de solo pelviano
8 de marzo – 11:30 – Casa da Xuventude
Sara Iglesias Sánchez, de CarabelSaúde, explicaranos algúns exercicios para coidar e manter en forma o noso solo pelviano.
Falando sen cancelas: A saúde das mulleres
8 de marzo – Estreo en Redes Sociais
Conversación con Estefanía Cabarcos Fernández, matrona do Centro de Saúde, sobre a relación entre a saúde física, mental e emocional das mulleres, con preguntas en colaboración coas alumnas das clases de solo pelviano.
Bravas con Isabel Risco
15 de marzo – 19:00 – Casa da Cultura
A actriz interpreta as vidas das mulleres galegas ao longo da historia coa súa mestura inconfundible de humor e rebeldía.
Pixamada de cine en igualdade con Brío
21 de marzo – 19:00 – Casa da Cultura
Traede o pixama e unha manta quentiña para gozar coas aventuras da guerreira “Ainbo: O espírito do Amazonas”, seguida dunha pequena fala coa Axente de Igualdade reflexionando sobre a película.
Obradoiro de escultura colectiva con Saila Chao e a ACRD Santa Mariña do Monte
29 de marzo – 11:00 – Local Social da Golpilleira
Con cartón prensado e moita cor, cada persoa elaborará pezas con frases e recordos que se unirán nunha obra común, simbolizando a rede de coidados entre as mulleres e a comunidade.
Para máis información, podes contactar en oriana.lopez@sansadurnino.gal ou chamar ao 695 876 178.
