A progresiva mellora da situación sanitaria e a rebaixa das restricións -que non da precaución que se debe ter- levaron ao Concello a reabrir o ximnasio municipal, pechado desde hai máis dun ano. A data sinalada é o próximo 29 de xuño e o traballo no interior das instalacións só poderá facerse, de momento, en quendas de dúas horas e de 6 en 6 persoas, con reserva previa a través do teléfono 672 942 426. Os luns e mércores abrirá de 15.30 a 23.00h e os martes e xoves só polas mañás, entre as 8.30 e as 16.00h, aínda que de 11 a 14.00h a actividade será exclusivamente ao aire libre e nese caso para grupos de ata 10 persoas. Os venres o traballo concentrarase pola mañá dentro das instalacións.
Polo de agora o ximnasio seguirá aplicando as medidas preventivas actuais, que poderían verse modificadas nos próximos días segundo o que publique a Xunta en canto a capacidades máximas e grupos (prevese que mañá saia unha nova orde ao respecto).
O que si é seguro é que o acceso ao interior das instalacións se fará en grupos reducidos (6 persoas ao mesmo tempo), mantendo a separación de 1,5 metros e coa obriga de que cada usuario ou usuaria desinfecte os aparellos antes e despois de usalos. Tamén será obrigatorio o levar máscara en todo momento, ademais de empregar a toalla para protexer, por razóns hixiénicas, aqueles equipamentos onde se produce un maior contacto co corpo, como por exemplo bancos de pesas e abdominais ou bicicletas estáticas.
No caso das actividades que se fagan no exterior os grupos poderán ser de ata 10 persoas, gardando tamén a separación e con máscara. O material necesario para as rutinas -esterillas, bandas elásticas, etc.- haberá que traelo da casa.
Para poder utilizar o ximnasio -incluída a asistencia e dirección dos exercicios por parte do técnico municipal- será necesario reservar a través do teléfono 672 942 426. Para facilitar as cousas, o responsable do servizo creará un grupo de whatsapp e irá publicando cada día os horarios das quendas e o número máximo de participantes en cada unha delas, co obxectivo de que as persoas interesadas poidan ir enchendo os ocos dispoñibles ata cubrir o aforo, sexa para actividade en interior ou en exterior.
As sesións serán todas de dúas horas de duración, deixando un cuarto de hora de marxe para ventilar e para a entrada escalonada de usuarias e usuarios entre aquelas quendas que se desenvolvan dentro do ximnasio.
-
DÍAS
ACTIVIDADE
QUENDAS
Luns e mércores
Traballo no ximnasio
16.00 a 18.00h
18.15 a 20.15h
20.30 a 22.30h
Martes e xoves
Traballo no ximnasio
9.00 a 10.45h
14.15 a 16.00h
Traballo no exterior
11.00 a 12.30h
12.30 a 14.00h
Venres
Traballo no ximnasio
9.00 a 11.00h
11.15 a 13.15h
13.30 a 15.30h