Este xoves remata o prazo de preinscrición nas escolas municipais, que de cara ao outono volven ofertar as actividades de ximnasia de mantemento para persoas maiores e as tres musicais: gaita, pandeireta e cantos de taberna. Iso si, fará falla xuntar un mínimo de 8 persoas por grupo para que as escolas vaian adiante e por este motivo hai un primeiro prazo para anotarse -o que remata este 30 de setembro- e, unha vez se confirme o grupo, outro para facer a matrícula, que comezará o luns 4 de outubro, coincidindo coa semana de arranque das escolas. Polo tanto, nos días tres días que quedan hai que chamar ao 981 490 027 (débese agardar a ser atendido/a persoalmente, non pulsar a opción “Cultura”) e indicar a actividade ou actividades en que se quere participar. Este ano como novidade engádese como experiencia piloto o baile tradicional. Quen queira poderá probar de balde durante tres meses e, se hai interese, manteríase ata xuño tamén como escola municipal.
Este ano a área de Cultura pretende que haxa unha maior integración das distintas escolas musicais co obxectivo de que teñan un repertorio mínimo compartido e que os distintos grupos poidan actuar en solitario ou ben botarlle unhas pezas en conxunto en repichocas e outros eventos.
Ademais tamén se quere formar un grupo de baile que complete a festa punteando muiñeiras e jotas ou con pasodobres e valses agarrados. Por iso se organiza un obradoiro gratuíto durante os próximos tres meses para toda aquela xente de calquera idade que se anime a probar. Para anotarse só hai que chamar ao 616 332 919 ou ao 981 490 027 (agardar a ser atendida/o persoalmente) ou mandarlle un correo a agustin.perez@sansadurnino.gal. Se a iniciativa ten éxito, o grupo continuaría despois como escola municipal estable.
Co empezo de outubro volven as sesións de música tradicional -Gaita e Pandeireta-, Cantos de taberna e tamén as dos grupos de ximnasia de mantemento para persoas maiores, que deberán formalizar a matrícula a partir do 4 de outubro, data na que tamén arrancarán as escolas. As distintas actividades teñen os seguintes horarios:
Ximnasia de mantemento:
-
Naraío: luns e mércores de 16:00 a 17:00h
-
Lamas: luns e venres de 17:15 a 18:15h
-
San Sadurniño: martes e xoves de 16:00 a 17:00h
-
Santa Mariña: mércores de 17:15 a 18:15h e venres de 16:00 a 17:00h
Gaita (martes):
-
19:30 a 21:00h Iniciación
-
21:00 a 22:30h Perfeccionamento
Pandeireta (mércores):
-
17:00 a 18:00h Iniciación rapazada
-
18:00 a 19:00h Iniciación persoas adultas
-
19:00 a 20:00h Perfeccionamento persoas adultas
Cantos de Taberna: xoves, de 20:00 a 22:00h.
Unha vez que se confirmen os grupos deberá efectuarse o pagamento da matrícula na Casa da Cultura en horario de mañá, onde tamén é posible domiciliar os recibos. Os prezos son os seguintes: 16 € de matrícula e 31,83€ de cota trimestral para maiores de 18 anos e menores de 65. As persoas menores de 18 anos, maiores de 65, pensionistas, estudantes, familias numerosas e titulares do Carné Xove teñen un pequeno desconto, polo que lles quedaría en 15,32 euros de matrícula e 21,23 cada trimestre.
