Achegámonos ao Nadal e a programación municipal de Cultura e Deportes vai collendo forza. Esta mañá o alumnado do CPI asistiu na Casa da Cultura á representación da obra “Un lugar chamado Mundo”, da compañía Verdeveras, a través da que descubriron o rico patrimonio inmaterial de varios países seguindo as aventuras dunha nena regueifeira e do seu compañeiro de viaxe, o aviador Nicolai. A obra foi un aperitivo do que chegará o sábado á tarde. A partir das 19.00h. Magín Blanco encherá o auditorio de rapazada co musical “A Nena e o Grilo nun barquiño”. E aseguramos que encherá porque nesta mañá de xoves xa estaban reservadas case todas as entradas para o espectáculo. O domingo, ademais do mercado da mañá, teremos unha tarde dedicada ao deporte en feminino e cunha finalidade solidaria. Será no pavillón municipal a partir das 17.00h. coa actuación de Brío, dos grupos de ximnasia para persoas maiores e do alumnado que asiste a clases de ioga na Casa da Cultura. A xornada finalizará cun partido entre as xuvenís do Aldebarán e o Narón volea.
Magín Blanco meteranos de cheo o sábado pola tarde nun espectáculo que atrae masas infantís aló por onde pasa. Esta é a segunda entrega das aventuras da Nena e o Grilo descubrindo a inmensidade do mundo e os seus segredos.
“A Nena e o Grilo nun barquiño” é unha obra especialmente indicada para idades desde os tres ata os dez anos ou incluso máis, xa que conta con diálogos e cancións a través dos que se transmiten valores válidos para a infancia e para quen xa pasou esa etapa. A solidariedade, o respecto da natureza, a identidade, os afectos e a curiosidade son algúns deles.
Comezará ás 19.00h. na Casa da Cultura con entradas ao prezo de 5€ que esta mañá xa case todas reservadas. Algunha aínda quedaba e quen queira gardar sitio deberá chamar ao 616 332 919 ou enviar un correo a agustin.perez@sansadurnino.gal. Outra posibilidade é probar sorte o sábado á tarde por se fallase algunha das reservas.
Deporte solidario o domingo
A tarde do penúltimo domingo do ano estará ocupada por enteiro polo deporte en feminino e cunha finalidade solidaria. O Pavillón Municipal acollerá varios eventos. Entre eles un partido de voleibol que enfrontará ao Aldebarán xuvenil e ao Narón-Volea e a exhibición do Club Brío. Un cambio federativo de última hora obrigou ao Concello a retirar da programación o encontro de fútbol sala que ían disputar A Fervenza e o Viaxes Amarelle FS, que se substituirá por exhibicións dos grupos de ximnasia para persoas maiores e das clases de ioga que se imparten na Casa da Cultura.
Así, o programa da Xornada de deporte feminino quedará da seguinte maneira:
17.15h. Exhibición de baile moderno Brío
17.45h. Exhibición da EM de ximnasia para persoas maiores
18.15h. Exhibición de Ioga
18.45h. Exhibición ximnasia rítmica e hip-hop Brío
19.15h. Voleibol: Aldebarán vs. Narón volea.
A entrada é gratuíta, pero pídeselle ao público que traia da casa algún alimento non perecedoiro, como poden ser conservas, arroz, galletas, pastas, fariña, leite en pó, cacao, azucre, aceite, lentellas, garavanzos, turróns, polvoróns, etc. Ademais tamén se recollerán artigos de limpeza e hixiene persoal, como xabóns, pasta de dentes ou cueiros. Co que se recolla faranse lotes que despois serán distribuídos polos Servizos Sociais do Concello entre aquelas familias do municipio con menos recursos.
