Ata o día 31 de marzo permanecerá aberto o período de solicitude de praza na Escola Infantil Municipal A Rolada para o curso 2022/2023. Este segundo prazo ábrese para as familias que queiran matricular as súas nenas e nenos no centro por primeira vez. No período de reservas para crianzas que xa están na escola -aberto durante a primeira quincena deste mes- recibíronse 11 solicitudes, de maneira que a EIM disporía aínda de 27 prazas dispoñibles nos distintos cursos. As solicitudes de novo ingreso poden tramitarse de maneira presencial ou, preferentemente, a través da Sede Electrónica municipal.
Os servizos da EIM A Rolada diríxense preferentemente a familias empadroadas no municipio con nenos e nenas de entre tres meses e tres anos de idade. Só no caso en que haxa vacantes poderá admitir alumnado doutros concellos priorizando aquelas familias que teñan o seu posto de traballo nunha empresa de San Sadurniño.
A escola dispón de 38 prazas distribuídas en tres unidades: 8 na de nenos e nenas de tres meses a un ano, 13 na de criaturas de un a dous anos e 17 na ocupada por cativería de entre dous e tres anos. Unha vez finalizado o período de reservas para o alumnado matriculado este ano, o Concello conta xa con 11 peticións, de modo que, en principio, habería dispoñibles para novos ingresos un total de 27 prazas: as 8 da unidade de 0-1, 12 na de 1 a 2 anos e 7 na aula de 2 a 3.
O horario de apertura máximo é de 8 da mañá a 8 do serán de luns a venres e, dentro del, pódense elixir de catro a oito horas de atención educativa. Esta posibilidade ten, á súa vez, varias opcións: xornada completa continuada ou partida, media xornada de mañá ou media xornada de tarde. A parte educativa complétase con servizo de cociña achegada polas familias ou de comedor mediante servizo de cátering, actividades paralelas e extraescolares e con saídas e excursións dentro do horario de atención, como parte fundamental do currículo do centro.
As tarifas vixentes para os servizos que presta a EIM son as seguintes, tras actualizarse co IPC correspondente a este ano. De feito, as cotas saíron publicadas no BOP do pasado 18 de febreiro canda o resto de taxas e prezos públicos actualizados que aplicará o Concello ao longo de 2022:
CONCEPTOS |
COTA VIXENTE |
Matrícula (anual) |
22,64 € |
Mensualidade a xornada completa (8h.) |
220,73 € |
Mensualidade a media xornada (4h.) |
132,44 € |
Xornada de 2 horas |
79,24 € |
Hora complementaria (prezo mensual) |
22,64 € |
Hora extraordinaria (prezo diario) |
3,96 € |
Comedor mensual para almorzo |
28,30 € |
Comedor mensual para xantar |
88,29 € |
Comedor mensual para merenda |
28,30 € |
Comedor en día solto |
4,53 € |
Cómpre ter en conta que neste momento se está á espera de que a Xunta de Galicia decrete a gratuidade do servizo para toda a rapazada e non só para segundos fillos ou fillas. A medida, da que xa hai tempo que se vén falando, tratouse nunha xuntanza mantida este martes 15 de marzo entre a Executiva da Fegamp e representantes de Política Social e prevese que en breve saia publicada no Diario Oficial de Galicia. Polo tanto, haberá que agardar ata ese intre para coñecer como quedará a redacción final, que posiblemente obrigue a modificar a ordenanza reguladora do servizo municipal para adaptarse a ela. En calquera caso, chegado o momento, a gratuidade tamén será de aplicación na escola de San Sadurniño.
Solicitudes ata o 31 de marzo
Para obter máis información sobre o procedemento de solicitude de praza de novo ingreso hai que contactar coa responsable técnica do Concello nas oficinas de Servizos sociais e Igualdade, no teléfono 981 490 027 ou no correo veronica.rodriguez@sansadurnino.gal.
As familias tamén poden dirixirse á propia EIM A Rolada -981 490 369- onde lles facilitarán toda a documentación e solventarán calquera dúbida. As solicitudes deberán rexistrarse no Concello, ben de forma presencial ou preferentemente a través da Sede Electrónica municipal. O último día é o 31 de marzo.
Folla de solicitude de praza
Regulamento da EIM*
Ordenanza fiscal reguladora *
Actualización de cotas tributarias, prezos públicos e taxas, segundo o IPC*
Acceso ao trámite na Sede Electrónica Municipal
(*) Suxeitos a cambios no momento en que a Xunta publique oficialmente a gratuidade destes servizos.