O primeiro sábado do mes de xullo está marcado no calendario desde hai varios anos como a data en que, si ou si, hai que ir bota-lo día e parte da noite á beira do río Castro para gozar das actividades e dos concertos do festival organizado pola A.VV. O Castelo de Narahío. O programa deste 2024 mantén a orde de todos os anteriores, propoñéndonos unha sesión vermú ao mediodía, xogos e un espectáculo para a rapazada pola tarde, deportes rurais á tardiña e música pola noite. Na presente edición, que fai a 29ª, veñen Vai Rañala Meu!, Teatro Ghazafelhos, Tres Pesos, Encrucillada, Os Viqueiras e, pechando a noite, A Requinta da Laxeira. O XXIX Festival do Río Castro conta con financiamento da Deputación da Coruña e tamén coa colaboración do Concello de San Sadurniño.
“Nunca viñeches ao Río Castro?. Pois tes que vir para seres parte dun festival que reivindica a cultura e o respecto polo ambiente cunha xornada de festa que, en certa maneira, tenta recuperar o espírito das romarías campestres de antano, hoxe alagadas na lucería, os escenarios móbiles e os ritmos monocordes de alén do Atlántico”.
Esta é a descrición que aparece na páxina web do “mellor festival do mundo mundial”, onde xa hai varias semanas que pode consultarse o cartel deseñado por Juanlu Nacha con todo o que vai haber este sábado 6 de xullo no lugar da Bóla, ao pé da ponte medieval da Ferraría.
Apoio da Deputación e do Concello
O XXIX Festival do Río Castro conta cun orzamento próximo aos 16.000€, sufragados con fondos da AVV O Castelo de Narahío e con achegas económicas da Deputación da Coruña e do Concello de San Sadurniño. Tamén colaboran a agrupación de Protección Civil de Narón -na coordinación do tráfico e das zonas de aparcadoiro- e unha chea de veciñas e veciños que ceden terreos e que botan unha man na loxística organizativa.
No mapa que se pode consultar na web do festival aparecen reflectidas cinco grandes áreas de estacionamento a escasos metros da Bóla. O acceso ao campo do festival pecharase ás 13:00h aproximadamente e, por razóns de seguridade, non se poderá aparacar en ningunha das pistas das inmediacións da Ferraría, Saldoiro e A Pena.
