Todo está listo xa na área recreativa de Corrás para darlle a benvida ao verán, que entrará oficialmente á volta de tres días. O vaso xa se estreou esta fin de semana con motivo do torneo de fútbol do CF San Sadurniño pero será este luns 18 de xuño cando se abra a temporada para o público en xeral, que poderá gozar ata o 16 de setembro de baños libres e tamén de cursos nun entorno reacondicionado o ano pasado que, ademais, convida a pasar o día ao aire libre. Os prezos das entradas e das actividades acuáticas son moi parecidos aos de 2017 e desde o Concello recoméndase sacar bono para que as entradas nos saian máis a conta. O trámite pode facerse na Casa da Cultura en horario de mañá.
O servizo da piscina estará aberto desde o 18 de xuño até o 16 de setembro, ambos días incluídos, aínda que con horarios ampliados os festivos e durante a fin de semana. Así, o horario xeral de baños libres estenderase desde as 15.00 até as 21.00h. de luns a venres e das 12.00 ás 21.00h. durante a fin de semana e festivos. Ademais, o recinto tamén acollerá cursos de natación os luns, mércores e venres de 11.00 a 14.00h. cos grupos habituais de prenatación, iniciación e perfeccionamento. Iso si, para que se forme cada un deles será necesario que haxa un mínimo de inscricións, que poden facerse desde hoxe mesmo na Casa da Cultura. Os cursos comezarán o 2 de xullo e rematarán o 31 de agosto.
Os prezos son practicamente os mesmos có ano pasado e só se incrementaron coa suba do IPC. As entradas individuais para baños libres deberán collerse cada día na cantina da piscina. Porén, os abonos para a temporada e a participación en cursos hai que adquirilos na Casa da Cultura en horario de 8.30 a 14.00h. os luns, mércores e venres.
O abono é unha opción certamente interesante xa que, por exemplo, unha persoa adulta que merque tique para toda a tempada -29,23 €- terao descontado en tan só 10 baños. A solicitude dos abonos pode facerse desde o pasado 11 de xuño.
Adxudicación da xestión da cantina
Por outra banda, o Perfil de contratante municipal tamén publicou o venres pasado o resultado do proceso de adxudicación da xestión do ambigú da piscina, que recaeu en Óscar Padín Villarnovo por un importe de 1.058,00€. A través desta ligazón pódese acceder á información sobre o procedemento ao que se presentaron cinco ofertas.
|
Entradas |
Prezos |
|
Entrada individual diaria de persoas adultas |
3,30 € |
|
Entrada individual diaria de persoas menores de 14 anos |
1,66 € |
|
Abono de tempada para persoas adultas empadroadas (maiores de 18 anos) |
29,23 € |
|
Abono de tempada para persoas adultas non empadroadas (maiores de 18 anos) |
37,58 € |
|
Abono de tempada familiar (ata 4 membros dos cales o 50% ou máis estean empadroados no Concello) |
52,20 € |
|
Abono de tempada familiar (ata 4 membros dos cales menos dos 50% estean empadroados no Concello) |
62,64 € |
|
Abono de tempada familiar, por cada persoa a partires da 5.ª (independente do empadroamento) |
5,22 € |
|
Cursos |
|
|
Abono mensual para cursos de natación para nenos e nenas empadroadas (ata 14 anos) |
12,53 € |
|
Abono mensual para cursos de natación para nenos e nenas non empadroadas (ata 14 anos) |
15,66 € |
|
Abono mensual para cursos de natación para persoas maiores de 14 anos empadroadas no Concello |
20,88 € |
|
Abono mensual para cursos de natación para persoas maiores de 14 anos non empadroados no Concello |
26,10 € |
