Desde hoxe está en vigor o decreto do Ministerio de Agricultura, Pesca e Alimentación que obriga a confinar todas as aves de curral que se crían ao aire libre en España. Trátase dun reforzo das medidas preventivas fronte á influenza aviaria, ante o aumento do risco de expansión desta enfermidade altamente infecciosa. A orde ministerial, publicada esta mañá no Boletín Oficial do Estado, estende a todas as granxas avícolas —incluídas as explotacións ecolóxicas e os galiñeiros de autoconsumo, así como aquelas que produzan carne ou ovos para a súa venda directa ao consumidor— a prohibición de que os animais permanezan ao aire libre, que xa rexía desde o pasado luns, día 10, para as zonas consideradas de especial risco e especial vixilancia.
Segundo informou o ministerio nun comunicado, a medida adóptase tras o aumento do risco de entrada da enfermidade en España na última semana. Para avaliar este risco, asegura o Goberno, téñense en conta factores como o número de focos notificados en Europa, os puntos nos que se localizan e os movementos de aves silvestres desde zonas de risco do continente.
En España constatouse unha abundancia de aves migratorias en zonas húmidas, algo habitual nesta época do ano. Ademais, o descenso das temperaturas é un factor que facilita a supervivencia do virus. As medidas de confinamento pretenden evitar o contacto das aves de curral coas migratorias, que poden ser portadoras do virus.
Desde o mes de xullo notificáronse 139 brotes de influenza aviaria en granxas avícolas de Europa. En España producíronse 14 focos en explotacións, a metade deles en Castela e León, ademais de 53 en aves silvestres e 5 en aves en catividade.
A orde publicada hoxe inclúe ademais as seguintes medidas:
-
Prohíbese a cría de patos e gansos xunto con outras especies de aves de curral.
-
Prohíbese dar auga ás aves de curral procedente de depósitos aos que poidan acceder aves silvestres, agás no caso de que esa auga sexa tratada para garantir a inactivación de posibles virus de influenza aviaria.
-
Os depósitos de auga situados no exterior, necesarios por motivos de benestar animal para determinadas aves de curral, deberán estar suficientemente protexidos fronte ás aves acuáticas silvestres.
-
Prohíbese a presenza de aves de curral ou outro tipo de aves en catividade en centros de concentración de animais, incluídos certames gandeiros, mostras, exposicións e celebracións culturais, así como en calquera outra concentración de aves de curral ou aves en catividade.
-
Nos casos nos que non sexa posible o confinamento das aves de curral, a autoridade competente das comunidades autónomas poderá autorizar o seu mantemento ao aire libre mediante a colocación de mallas paxareiras ou calquera outro dispositivo que impida a entrada de aves silvestres. Neste caso, as aves deberán alimentarse e abeberarse no interior das instalacións ou nun refuxio que evite a chegada de aves silvestres e o contacto destas cos alimentos e coa auga destinados ás aves de curral.
Hai dispoñible máis información sobre a influenza aviaria (ficha da enfermidade ou as últimas notificacións) nesta ligazón.
