A maior parte da veciñanza de San Sadurniño ten xa na casa o recibo do lixo, calculado cos prezos fixados na ordenanza aprobada hai un ano. As tarifas sitúanse en 90 euros anuais nas vivendas unifamiliares cunha recollida semanal e en 130 euros nas que o camión pasa dúas veces. Porén, debido a un erro na emisión dos recibos, non se aplicou a bonificación do 10% aprobada pola Administración local, polo que se devolverán 9 e 13 euros segundo o caso. Iso si, será necesario facilitarlle ao Concello un número de conta para que nos ingrese nela o pagado de máis.
As persoas que teñan o recibo domiciliado non terán que facer nada, xa que a devolución se fará efectiva directamente na conta bancaria asociada á domiciliación. Pola contra, as que paguen o recibo acudindo ao banco ou por transferencia electrónica deberán aboar o importe completo que aparece na carta de pagamento (90 ou 130 euros) e, a continuación, solicitar a devolución da diferenza. Esta fórmula permite axilizar o proceso e evitar o retraso e os custes que suporía anular e volver emitir todos os recibos.
O Concello ofrece dúas opcións para solicitar a devolución:
- Opción A: Presentar na Sede Electrónica ou no Rexistro municipal unha solicitude xenérica indicando o número do recibo xa pagado e achegando un certificado de titularidade da conta bancaria.
- Opción B (a máis sinxela para quen non teña ordenador nin se manexe coa informática): Acudir en persoa ao Rexistro municipal en horario de mañá co recibo pagado e un documento -pode ser a libreta do banco, un certificado ou outro recibo- onde consten os datos da conta da persoa titular do servizo, de xeito que o Concello lle poida facer o ingreso directamente despois das comprobacións oportunas.
Lémbrase que é moi importante pagar o recibo polo importe completo que figura nel —90 ou 130 euros—, xa que só así se poderá tramitar a devolución correspondente de 9 ou 13 euros. Non se debe acudir ao Concello sen ter realizado antes o pagamento, xa que se non non se poderá practicar a devolución.
As solicitudes deben presentarse preferiblemente dentro do período voluntario de pagamento, que remata a finais deste mes, aínda que tampouco haberá inconveniente en pedir a devolución até mediados de decembro. Cómpre ter en conta que os recibos que pasen ao período executivo xa se emitirán cos importes correctos, pero levarán o recargo que lles corresponde polo atraso no .
Desde o Concello préganse desculpas polos inconvenientes ocasionados por este erro involuntario, producido durante a carga dos padróns que xestiona a Deputación da Coruña como entidade encargada da recadación do lixo e doutros impostos municipais. Para calquera aclaración sobre como proceder coa devolución, pode chamarse ao 981 490 027 ou achegarse ás oficinas municipais en horario de mañá.
Unha bonificación do 10% ante a inminencia da chegada da compostaxe
A modificación da ordenanza fiscal do lixo aprobouse en novembro do ano pasado cos votos favorables de BNG e a abstención do PP, nun pleno sen a asistencia do único representante do PSdeG-PSOE. No novo articulado establécense dous prezos para os domicilios en función da frecuencia da recollida: 90 euros anuais para as vivendas unifamiliares cunha única recollida semanal e 130 euros para as que teñen dúas.
Con todo, e ante a inminencia dun cambio de modelo de xestión que aposta pola compostaxe doméstica —na que será a veciñanza quen se encargue de tratar a fracción orgánica—, o Consistorio decidiu aplicar de oficio unha bonificación do 10% a todos os recibos domiciliarios. Deste xeito, os importes reais que hai que pagar neste 2025 son 81 e 117 euros, respectivamente
Por causa dun erro involuntario na carga dos padróns realizada pola Deputación da Coruña, os recibos emitidos non recolleron esa redución. Ante esta situación, a Administración local habilitou o procedemento de devolución do importe cobrado de máis: 9 euros no caso das vivendas unifamiliares cunha recollida semanal e 13 euros nas que teñen dúas.
