Volvendo ao tema do Geolodía 2017, cómpre sinalar que os tres días -6,7 e 13 de maio- vai facerse o mesmo percorrido, co obxectivo de admirar algúns dos puntos máis interesantes da contorna desde o punto de vista paisaxístico e xeolóxico. Visitaranse enclaves dos concellos de San Sadurniño, Neda e A Capela que, en certa medida, teñen como eixo principal a área do Forgoselo “onde o granito e a auga son protagonistas”, tal e como explica Francisco Canosa.
O itinerario comezará pola mañá e durará até o serán. Tempo no que as persoas participantes se achegarán á central do Eume e á zona de Teixido na Capela, á Fervenza do Belelle e as Penas Louseiras -en Neda- e á zona do Castelo de Naraío e do alto de Racamonde, en San Sadurniño, onde se fará a ruta das Pías, encadrada nas propostas divulgativas deseñadas por Canosa para o proxecto do xeoparque do Cabo Ortegal.
É unha actividade gratuíta que se fará viaxando en bus para cambiar de lugar e despois a pé para visitar cada sitio, percorrendo sendeiros e camiños de dificultade baixa. Estímase que ao longo do día non se camiñen máis de tres quilómetros en total, o que fai do Geolodía 2017 unha proposta lúdica e divulgativa axeitada para calquera idade.
O autobús sairá os tres días de diante do Concello da Capela ás 9.00h., fará parada diante do de Neda ás 9.30h. e chegará ao de San Sadurniño ás 10.00h. para inciar desde alí o percorrido xeolóxico propiamente dito. Para a volta o autocar repetirá ruta, parando ás 18.00h. na Capela, ás 18.30 en Neda e ás 19 en San Sadurniño. Ás 14.00h. farase unha pausa para xantar na área recreativa de Río Cuberto, preto de Formariz, onde non hai bar nin restaurante, polo que as persoas inscritas deberán levar a súa comida e bebida.
Para apuntarse nas tres rutas abriuse un formulario en liña que completou o cupo de solicitudes en poucas horas. Porén, a aplicación tamén permitía inscribirse nunha lista de agarda por se se producían baixas de última hora. Nesta última hai apuntadas case medio cento de persoas.
As actividades co gallo do Geolodía 2017 están organizadas pola Asociación de Amigos do Parque xeolóxico do Cabo Ortegal e financiadas polas administracións locais de San Sadurniño, Neda e A Capela, xunto coa Fundación Española para a Ciencia e a Tecnoloxía (FECYT). Tamén colaboran a Sociedade Xeolóxica de España, a Asociación Española para a ensinanza das ciencias da Terra e o Instituto Xeolóxico e Mineiro de España.
III Torneo de ximnasia rítmica Brío
Cómpre lembrar que este sábado o pavillón municipal estará ocupado durante boa parte do día pola ximnasia rítmica e polo baile moderno con motivo da terceira edición do torneo organizado por Brío. 25 clubs e preto de 500 deportistas de toda Galicia competirán en 14 categorías, desde conxunto baby escolar até individual.
O torneo comezará ás 10 da mañá coas competicións escolares e sobre as 16.30h. está previsto o inicio das disciplinas de promoción e de base. O evento finalizará sobre as 20.00h. e, ademais de rítmica, tamén ofrecerá exhibicións de danza. A entrada é gratuíta.
As dúas entidades organizadoras -o Club Deportivo Brío e a Asociación Cultural Brío- contan con apoio do Concello de San Sadurniño e da Deputación da Coruña, xunto co de varias firmas comerciais de dentro e fóra de San Sadurniño.
Hai máis información na páxina en Facebook de Brío Danza e Rítmica.
