San Sadurniño acolle o día 11 o XII Encontro escolar de Xogos Tradicionais

0

A leira do arboreto galego da Cortiña, ao pé do Xubia, acollerá o sábado 11 de maio a duodécima edición do Encontro escolar de Xogos tradicionais que quedara suspendida o ano pasado por estas mesmas datas. A asociación Brinquedia, quen organiza o evento desde 2005 como xeito de recuperar e promocionar os xogos e enredos de toda a vida, reunirá en San Sadurniño centros de ensino de toda Galicia para poñer en práctica unha trintena de xogos, pero tamén para participaren en obradoiros e exhibicións. Todo nun ambiente non competitivo e integrador do que, ademais da rapazada e o profesorado, tamén poderán formar parte as súas familias. 

Brinquedia, Rede Galega do Xogo Tradicional concibe os encontros anuais como unha cita que culmina o traballo desenvolvido en cada colexio, onde esta asociación e o profesorado implicado tentan introducir os entretementos tradicionais como unha actividade curricular máis.

De feito, entre os obxectivos da entidade están o de contribuír á recuperación e difusión do patrimonio lúdico galego e, máis que nada, que as nenas e nenos manteñan viva unha maneira de brincar cargada de cultura e de sinais de identidade propios. Xeitos de pasalo ben, de relacionarse e de construír comunidade que nos últimos tempos se están vendo seriamente ameazados pola irrupción das canles temáticas e a masificación dos dispositivos dixitais de todo tipo: videoconsolas, táblets, móbiles, etc.

A xornada do sábado 11 de maio terá dúas partes, unha de mañá e outra de tarde cunha paréntese ao mediodía para un xantar campestre na propia leira da Cortiña. Haberá carpa no recinto cun menú a base de empanada, xamón ao caldeiro con patacas, pan, viño, gasosa, auga, sobremesa e café. Prezo: 10,50 €. Cómpre reservar no 689 833 210.  Existe tamén a posibilidade de vir de merendada ou de acudir a algún dos restaurantes próximos. A un paso -non fai falla coche- temos o Mesón A Granxa e O Muíño do Pepe, para os que se recomenda tamén facer reserva anticipada. A escasos cinco minutos en coche tamén están o restaurante Riboira -Lamas- e Os Cazadores, en Santa Mariña do Monte.

A mañá -de 11 a 14.00h. máis ou menos- está pensada para brincar de forma rotatoria nos xogos que haberá dispoñibles, practicamente todos grupais. Carreiras de sacos, carrilanas, as bólas, o tres en raia, a mariola, tiro de corda, a rá, o pano, o peón, o aro, a billarda… e así ata compoñer unha oferta de 30 entretementos que, a diferenza da tele, o móbil e as consolas, non precisan electricidade nin conexión á rede. Cómpre destacar que durante as actividades da mañá permanecerá cortada ao tráfico a pista que une o Centro de Día coa Ponte da Cortiña.

Pola tarde o programa arrancará ás 15.30h. con Circus Magníficus, un espectáculo con moito humor  dirixido a público infantil e familiar. Posteriormente -desde o remate da actuación até as  17.30h., haberá exhibicións de billarda, de chaves de Ferrolterra, Ourense e Santiago, loita galega da man da asociación A Cambadela (A Estrada) e birlos ao xeito en que se xoga en Parada de Sil. Tamén poderemos ver  un exercicio de serrado con tronzador con axuda de membros da AVV O Castelo de Narahío.

Todas as actividades estarán coordenadas por monitoras e monitores e complétanse con talleres de construción de enredos pensados principalmente para a xente miúda, aínda que neles tamén poderán aprender as mamás e os papás. Ademais, na cita tamén haberá un espazo expositivo para mercar xogos e libros especializados ou ver ao vivo o proceso de fabricación artesanal dunha grande variedade de aparellos sen moita complicación técnica, adaptados a calquera idade, sostibles e practicamente irrompibles.

O XII Encontro Escolar de xogos Tradicionais organizado por Brinquedia finalizará sobre as 18.00h. coa entrega de agasallos a cada participante. O colectivo de ámbito galego agarda que ese día se reúnan na Cortiña varios centos de nenos e nenas, ademais das familias, o profesorado e o persoal que colabora na organización.

A iniciativa xurdiu en 2005 a raíz dunhas xornadas galego-portuguesas de xogos tradicionais celebradas na Capela un ano antes. Alí profesoras e profesores de varios centros galegos comprometéronse  a introducir e potenciar nos colexios os entretementos de toda a vida e tamén a organizar un encontro anual que, desde aquela, xa se celebrou en Santiago, Culleredo, Pereiro de Aguiar, Silleda, Lugo, A Estrada, Xermade, Melgaço, Muimenta e Narón. O ano pasado tocáballe facerse en San Sadurniño, pero un problema da organización impediu no último momento que o encontro fose adiante. Ese é o motivo de que, neste 2019 se volvese elixir o noso concello para o evento e de que se manteña a edición como 12ª e non como 13ª.

Para coñecer máis datos sobre as actividades de Brinquedia e seguir a actualidade sobre o encontro do día 11 de maio en San Sadurniño, pódese seguir o blog www.brinquedia.net ou contactar coa asociación a través de brinquedia@brinquedia.net. Desde a entidade infórmase, ademais, que no caso de haber mal tempo a actividade trasladarase ao entorno do colexio público.

Xogos tradicionais tamén nos xardíns municipais
O Concello de San Sadurniño colabora coa asociación no desenvolvemento do encontro de centros escolares e aproveita a ocasión para lembrar que nos xardíns municipais existe un recuncho para a práctica de xogos e deportes tradicionais. De feito, foi Brinquedia quen asesorou ao Concello na transformación da antiga pista de tenis da Marquesa nunha cancha multixogos dividida en varias áreas  con liñas para o tres en raia, o brilé, as chapas e outras actividades.

Ademais, tamén no lugar existen dous recintos para xogar á chave ou á rá. Para estes dous últimos deportes tradicionais o Concello adquiriu o equipamento necesario -chaves, a rá, fichas e pellos- que poden solicitarse na Casa da Cultura.

Share.