A área de Cultura e Deportes preparou para estas datas de Nadal e Reis unha completa programación de lecer para toda a familia. Despediremos este ano e darémoslle a benvida a 2019 con teatro, música, deporte, obradoiros para a rapazada e actividades para a todas as idades. Toma nota!
Sábado 15 de decembro
18.30h. Casa da Cultura
Teatro de monicreques: “Circo galaico”
Chega a San Sadurniño un circo moi especial. É o Circo galaico de monicreques que nos trae a compañía Títeres Alakrán e, coma calquera circo, ofrecerá marabillosos números de habilidade, de humor e de música. Pola pequena pista da Casa da Cultura pasarán, entre outros, Xaquín, o xabaril forzudo; Corvus, o corvo equilibrista; Pedriño, o raposo que fai malabares con ovos; Rolín, o pallaso que agocha un segredo na cabeza… e, non podía faltar, a principal artista do elenco: a cabuxa Rivelina.
Trátase dun espectáculo ben entretido apto para toda a familia, aínda que quen gozará especialmente con el será a rapazada máis pequena. As entradas son gratuítas para menores de 18 anos, mentres que as de persoas adultas irán ao prezo de 5€. Poden reservarse chamando ao 616 332 919 ou a través do correo agustin.perez@sansadurnino.gal.
Venres 21 de decembro
16.30h. Casa da Cultura
Concerto de Nadal do alumnado de Ilia Keilin
A rapazada que está aprendendo música co profesor Ilia Keilin preparará para a ocasión unha pequena mostra das súas evolucións interpretando varias pezas clásicas. A cita é na Casa da Cultura con asistencia de familiares e de todas aquelas persoas amantes da música de cámara. Os niveis iniciais tocarán sinxelas melodías para vibráfono, mentres que o alumnado con máis coñecementos instrumentais lerá partituras para piano, violín e outros instrumentos que o mestre imparte semanalmente na Casa da Xuventude. A entrada é libre ata completar as 150 localidades do centro cultural.
19.00h. Local social da Veiga, Naraío
Nadal na lareira co Mago Teto, organizado pola A.VV. O Castelo
A asociación veciñal de Naraío pecha o seu calendario anual co Nadal na lareira, que este ano ten como convidado ao Mago Teto. Ofrecerá un espectáculo abraiante e moi divertido pensado para a rapazada e persoas adultas. Ao seu remate -sobre as 20.00h.- os nenos e nenas recibirán ao Apalpador. Un ser máxico que sempre vén cargado con algún detalle que deixarlles. O evento pechará cunha merenda de bica con chocolate ben quentiño.
19.30h. Casa da Cultura
Cine: “Sicixia”
Xiao, enxeñeiro de son, recibe a encarga de gravar os singulares ambientes da Costa da Morte. Alí coñece a Olalla, unha guía local que lle axudará a mergullarse na idiosincarisa do lugar. A partir de aí, nesta lendaria Finisterrae, as súas vidas fuxirán do seu control coma mareas rexidas por unha lei superior. O filme dirixido por Ignacio Vilar -e protagonizado por Marta Lado e Monti Castiñeiras- retrata o patrimonio da Costa da Morte cunha historia entre a ficción e a realidade que, entre outros valores, fomenta a igualdade de xénero. A entrada é gratuíta, aínda que fai falla reservar previamente convite no 616 332 919 ou en agustin.perez@sansadurnino.gal.
Sábado 22 de decembro
17.30h. Casa da Cultura
Festa infantil de Nadal
O sábado da lotaría é tamén o día elixido pola área de Cultura para organizar a tradicional festa para a cativería con idades comprendidas entre os 3 e os 11 anos. A programación estará marcada polos xogos cooperativos, a música, o baile e os obradoiros, que encherán o tempo dos nenos e nenas antes da chegada do Apalpador. O mítico carboeiro baixará das montañas cos petos cheos de castañas e algún que outro agasallo para as nenas e nenos. Para participar nesta actividade, que é gratuíta, fai falla inscrición previa pasando pola Casa da Cultura. Folla de inscrición (.pdf)
Mércores 26, xoves 27 e venres 28 de decembro
de 10 a 13.45h. Ximnasio do CPI e Pavillón municipal
Nadal Deportivo
O Concello organiza tres días de actividade deportiva e xogo para a semana central das vacacións escolares. É o programa denominado “Nadal Deportivo”, que propón encher o tempo libre das mañás iniciándose en distintos xogos e actividades que, por primeira vez, se dirixen a toda a familia e non a unha banda de idade concreta. Cada un dos días haberá tres entretementos distintos de hora e cuarto de duración cada un, con posibilidade de participar en todos ou só nalgún deles. O mércores haberá volei, xogos tradicionais e bicicleta. O xoves tocarálle ao fútbol, a ximnasia rítmica e o zumba. O venres a oferta comporana o baile moderno, o baile tradicional e a patinaxe.
Esta iniciativa é gratuíta e as inscricións haberá que facelas na Casa da Cultura o venres 21 como moi tarde. Quen se apunte a bicicleta e patinaxe deberá traer o material necesario. As actividades repartiranse entre o pavillón municipal e o ximnasio do CPI. Na organización colaboran o CF San Sadurniño, o Aldebarán, o club MTB Biela e Chaveta e tamén Brío. Folla de inscrición (.pdf).
Sábado 29 de decembro
18.30h-21.30h. Saída/chegada na praza do antigo Concello
Proba de orientación nocturna “Rogaine Inocentes 2018”, organizada polo Club de Montaña Ferrol
A rogaine é unha especialidade de orientación baseada na estratexia para percorrer nun tempo límite un circuíto cheo de balizas que as persoas participantes deberán descubrir coa axuda dun mapa e un compás (prohíbese a navegación GPS). O Club de Montaña de Ferrol deseñou un trazado polos montes de San Sadurniño con distintos niveis de dificultade -percorrido longo, curto e familiar- e un tempo máximo para completalo de 3 horas.
A participación é individual, aínda que o avance pode facerse en grupo. O prazo de inscrición remata o 25 de decembro ás 23.59h. a través da páxina da Federación Galega de Orientación ou directamente na sede do club. O custe son 7€ para persoas maiores de 18 anos e de 3€ para as menores desa idade. Quen non dispoña de licenza anual de raid terá que engadir 2€ para ter cobertura o día da proba, que non terá carácter de competición oficial.
Sábado 5 de xaneiro
17.30h. Ximnasio do CPI
Festa infantil e visita dos Reis Magos
O remate das datas do Nadal márcao a chegada dos Reis Magos de Oriente. Por máis que haxa “papanueles” e apalpadores, poucas figuras espertan tanta ilusión infantil como Melchor, Gaspar e Baltasar e a súa corte de paxes, capaces de percorrer nunha soa noite todos os fogares para colmalos de agasallos. Nas horas previas a esa noite en que se obra o milagro loxístico, os Reis pararán en San Sadurniño para escoitar peticións e recoller cartas de última hora.
Está previsto que entren no ximnasio do CPI sobre as 18.30 ou 19.00h., pero antes xa haberá troula no recinto con animación de La GuaGua: un castelo inchable, camas elásticas, obradoiros de manualidades e, por suposto, as súas exitosas coreografías pensadas para que canten e baile a rapazada e mesmo as mamás e papás.
Ata o 4 de xaneiro
de 8.30 a 14.30h. de luns a venres, Galería do Concello
Exposición fotográfica: “O ollo da aguia”, de Raúl Lomba
Os drons causaron toda unha revolución tecnolóxica nos últimos anos. Asequibles, cada vez máis sofisticados e con máis prestacións, estes aparellos teñen múltiples aplicacións aínda que as máis visibles e espectaculares sexan as audiovisuais. De feito, os RPA -nome técnico dos drons- conseguiron democratizar a filmación e a fotografía aérea e cuns resultados espectaculares cando son pilotados por persoas con ollo para a imaxe.
Un exemplo poderemos velo durante o Nadal na Galería do Concello, a través das fotos captadas por Raúl Lomba. Fotógrafo deportivo que colabora con numerosos medios, Lomba achéganos a súa mirada a vista de paxaro de recunchos de toda a comarca, unha mirada “distinta ao que estamos afeitos”. A exposición poderá visitarse de luns a venres no horario habitual de apertura do Concello, é dicir, das 8.30 ás 14.30h.
EXPOSICIÓN SUSPENDIDA: Debido a problemas de axenda do autor, a mostra fotográfica “O ollo da aguia” queda posposta para máis adiante. O seu lugar ocuparao desde o venres 28 unha exposición da pintora Adolfina Mesa.