A axenda de lecer da fin de semana ten nesta ocasión dúas referencias obrigadas relacionadas coa festa. Dunha banda temos o sábado e mailo domingo a celebración do San Cristovo en Ferreira de Arriba e, da outra, o XXV Festival do Río Castro que, como cada ano, ten lugar preto da ponte da Ferraría o primeiro sábado do mes de xullo. Para estas 25 edicións ininterrompidas do seu evento estrela, a Asociación Veciñal O Castelo de Narahío preparou unha programación especial que arrancará xa ao mediodía coa sesión vermú animada por Sérralhe-aí (Roberto Grandal e Manolo Maseda), acompañados para a ocasión por algúns dos nomes máis afamados da música galega. Quen son eses nomes é unha sorpresa -e non a única- que se desvelará a partir das 14.00h. do sábado. O resto da xornada segue o esquema habitual de xogos durante a tarde, unha actuación dirixida a público infantil e familiar cos Picompé, e os concertos da noite protagonizados polas escolas de música tradicional que se imparten na parroquia, polas regueifas de Luís “O Caruncho” e Lupe Blanco, así como as actuacións da asociación cultural Berce, do grupo pontevedrés Os Carunchos e d’Os Tres trebóns.
O Festival do Río Castro achégase este ano aos 16.000 euros de orzamento, cubertos coas achegas da entidade organizadora, cunha parte das subvencións da liña de Cultura do Concello, coa colaboración económica da Cooperativa de Meirás e, por último, coa participación económica da Deputación da Coruña.
Porén, ademais de carto, tamén fai falla outro tipo de axuda loxística. Diso encárganse a directiva da entidade e unha chea de socias e socios que sempre botan unha man traballando a reo ou cedendo espazos para a celebración do festival, para merendas ou como aparcadoiro. Para o dispositivo de seguridade a asociación conta coa axuda do S.P.E.I.S. e da agrupación de Protección Civil de Narón, ademais de obter apoio do posto da Garda Civil de San Sadurniño.
San Cristovo en Ferreira
Os caprichos do calendario quixeron que este ano coincidisen na mesma fin de semana o Río Castro e maila festa do San Cristovo que se celebra en Ferreira de Arriba. Unha romaxe tradicional que tenta recuperar o costume das merendadas arredor da capela do mesmo nome. De feito xa confirmaron a súa asistencia máis de medio cento de veciñas e veciños de Igrexafeita, que pasarán o sábado ao seu carón nun encontro organizado pola AVV Adiante.
O sábado e mailo domingo haberá misa e procesión co acompañamento dun grupo de gaitas procedente de Ares. A orquestra que animará a sesión vermú do 7 é a monfortina Pekados, quen volverá subir ao escenario pola noite xunto con Fania Blanco Show.
O domingo 8 de xullo a orquestra convidada para tocar ao mediodía e máis á noite é a luguesa Dilema.