O Concello volve sumarse á Hora do Planeta

0

A Hora do Planeta é unha campaña de WWF que comezou hai unha década en Australia como xesto simbólico na loita contra o cambio climático. Durante unha hora edificios públicos, empresas e fogares apagan as luces para expresar este compromiso. Porén, a Hora do Planeta tamén pretende concienciar a sociedade sobre a necesidade de adoptar medidas fronte aos danos provocados pola actividade humana no ambiente, así como reducir as emisións contaminantes, aforrar enerxía e rebaixar a contaminación lumínica. San Sadurniño súmase por segundo ano á convocatoria apagando este sábado o alumeado da praza do antigo Concello entre as 20.30 e as 21.30h.

A Hora do Planeta está aberta á participación de todos e todas de múltiples maneiras. A primeira é apagando as luces e desconectando aparellos eléctricos durante unha hora, que cadra sempre e en todo o mundo nun dos últimos sábados do mes de marzo e, nesta ocasión, o 25 entre as 20.30 e as 21.30h. Canda esta proposta principal tamén hai a posibilidade de suscribir en liña os compromisos da organización conservacionista Fondo Mundial para a Natureza (WWF), compartir a campaña a través das redes sociais ou, o máis doado, adquirir hábitos que reduzan a nosa pegada no planeta.

Trátase dunha iniciativa lúdica e de sensibilización que non persegue medir aforros enerxéticos nin calcular canta polución se deixou de botar á atmosfera durante esa hora en que todo se apaga. O que arrancou en 2007 como unha campaña publicitaria acabou por converterse nun dos maiores movementos voluntarios do mundo. O ano pasado superáronse as 10.000 cidades e vilas participantes de 178 países.

Para a convocatoria deste sábado o lema elixido é “O Planeta primeiro. Que ninguén te pare” e reivindica a necesidade de facer efectivo o Acordo de París -en vigor desde novembro de 2016- como paso fundamental para frear o cambio climático. A organización lembra, ademais, que 2016 foi o ano máis cálido rexistrado desde 1880 e que cada ano deste século bate a marca do anterior.

San Sadurniño unirase á Hora do Planeta apagando o alumeado da praza do antigo Concello. Un xesto ao que pode sumarse quen queira  este sábado entre as 20.30 e as 21.30h. O Concello tamén enviou a carta de adhesión á iniciativa, tal e como fixeron ata hoxe outros 12 municipios galegos: A Coruña, Carballo, Mugardos, Fene, Oleiros, Porto do Son, Santiago, Becerreá, Lugo, Monforte de Lemos, Ourense e Tui. Até o momento de preparar esta información en España adheríranse á campaña 351 cidades, 155 empresas e 179 asociacións, entre elas O Castelo de Narahío.

Share.