A Oficina do Censo Electoral -organismo dependente do INE- comunicoulle este martes ao Concello que xa pode descargar a base de datos correspondente ao listado de electores e electoras que poderán votar en San Sadurniño o próximo 26 de xuño. O censo estará dispoñible para consulta e para formular calquera reclamación entre o 9 e o 16 de maio, ambos días incluídos. De haber algún erro, as persoas interesadas poderán solicitar a súa corrección dentro dese prazo.
Xa hai anos que o censo electoral non se colga en papel no tablón de anuncios do Concello, senón que cada persoa debe facer a consulta dos seus propios datos no mostrador das oficinas municipais presentando calquera documento de identificación válido, como o DNI, o carné de conducir ou o pasaporte no que apareza a fotografía da persoa interesada.
Se houbese algún dato incorrecto -grallas no nome, lugar de residencia, nivel de estudos, etc.- é tamén no Concello onde dispoñen da folla correspondente para solicitar a modificación dos datos, que deberá entregarse debidamente cuberta e acompañada dunha fotocopia do documento de identificación. O Concello fará constar a data en que o elector ou electora causou alta no enderezo que figure na solicitude.
Esta solicitude terá que asinala a propia persoa interesada, non vale que ninguén o faga por ela, e o Concello deberá trasladarlla á OCE antes das 12.00h. do día 17 de maio para que dea tempo a incorporar os cambios ao censo que se empregará en xuño. Calquera reclamación presentada fóra do prazo comprendido entre o 9 e o 16 de maio non terá efecto neste proceso electoral e resolveranse posteriormente.
Para quen xa votase algunha vez o normal é que todos os datos estean ben a menos que cambiase de domicilio ou que aumentase o grao de formación desde a última convocatoria electoral. Porén, nunca está de máis comprobar que todo estea ao día. Algo que se recomenda especialmente para quen fixese recentemente os 18 anos e vaia votar por primeira vez o próximo mes de maio. Para calquera dúbida relacionada co censo hai varios teléfonos de consulta: 981 217 439, 981 217 426 e o 901.101.900.
Os horarios de consulta/reclamación no Concello son os seguintes:
-Luns 9 a venres 13 e luns 16 de maio: de 8.30 a 14.00h.
-Sábado 14 de maio: de 9.00 a 13.00h.
