Os equipos do Aldebarán de volei pecharon unha fin de semana con resultados desiguais en practicamente todas as súas categorías, aínda que semella que as distintas formacións da base e tamén o sénior feminino empezan a coller o ritmo da competición. Só veu para San Sadurniño a victoria das rapazas xuvenís colleitada diante do Vigo. Os outros cinco equipos perderon dando moita guerra e demostrando que teñen aptitudes para ir mellorando na clasificación tan pronto como alcancen o nivel de compenetración necesario. Quen continúa imparable é a formación absoluta. O Aldebarán-Intasa venceu o sábado na casa ao CyL Palencia 2018 por 3 a 0 e mantense como líder do grupo A da SM2.
Intensa xornada dos equipos de base do club Aldebarán, que esta fin de semana desprazou a case todas as súas formacións. Na categoría masculina os máis pequenos viaxaron a Monforte para enfrontarse ao Korbis e nada puideron facer ante o maior poderío físico e a calidade do conxunto local. Os cadetes e os xuvenís foron a Vigo baterse co Teis e tampouco puideron sacar nada en positivo, aínda que o conxunto cadete tivo a victoria nas súas mans. Tal e como apunta a crónica enviada polo club, ´”só lles faltou un pouco de experiencia e tamén serenidade nos momentos decisivos do 5º set”.
No tocante aos equipos femininos, as rapazas máis novas sufriron unha derrota clara fronte ás monfortinas e, aínda que mostraron boas maneiras, o potencial físico e técnico das xogadoras do Korbis foron determinantes no resultado.
A sorpresa dérona as mozas do xuvenil en Vigo. Sorprenderon a un Teis que partía como favorito, pero que á hora da verdade non soubo frear o conxunto do Sansa. As rapazas do Aldebarán loitaron desde o primeiro momento e non se esfondaron tras perder o primeiro set. A partir de aí emprenderon unha remontada que se fundamentou en boa parte no aproveitamento dalgúns erros defensivos do conxunto anfitrión. “Victoria merecida que, de seguro, cargará ás rapazas de ilusión e ánimo para os próximos compromisos”, asegura a crónica do Aldebarán asinada por Manolo Seco.
Por último, bo partido tamén do equipo sénior que, malia o pouco tempo que levan xuntas, mostrou que ten aptitudes para interpretar un bo papel na liga. Nel dase “unha boa mestura de veteranía e xuventude” e aínda que o resultado foi o que foi -perderon 3 a 0- si exhibiron un xogo vistoso e efectivo en varios momentos do partido que, malia todo, non logrou compensar a falta de acoplamento dun equipo “ao que aínda lle falta algo de rodaxe”.
A próxima xornada os equipos de base e o feminino sénior xogan na casa. Ao longo da mañá do sábado teremos derbi en varias categorías contra o Narón Volea e o domingo ás 12 as rapazas maiores reciben ao Bruxas de Ourense.
Resultados dos equipos de base e sénior feminino
Categoría feminina
- Senior: Teis 3 – Aldebarán 0 (25-14/25-15/25-19)
- Xuvenil: Teis 1 – Aldebarán 3 (25-15/22-25/15-25 y 22-25)
- Infantil: Korbis 3 – Aldebarán 0 (25-10/25-6 y 25/11)
Categoría masculina
- Xuvenil: Teis 3 – Aldebarán 0 (25-7/25-9 y 25 -8)
- Cadete: Vigo 3 – Aldebaran 2 (25-21/20-25/13-25/25-15 y 15-12)
- Infantil: Korbis 3 – Aldebaran 0 (259/25-13/25-21)
O Aldebarán-Intasa continúa líder
Quen está certificando un arranque de temporada memorable é o Aldebarán-Intasa, que mallou o sábado no CyL Palencia 2018. Un equipo que tradicionalmente encabezou as táboas clasificatorias da SM2 pero que nesta temporada 2016/2017 semella non estar rendindo como sería de agardar dunha escuadra formada pola canteira da selección absoluta que emprega a categoría de prata do volei como escenario no que pulir talentos que logo saltarán ao primeiro equipo estatal.
Como queira que sexa, a SM2 ten as mesmas regras para todos e son os resultados os que deciden quen está arriba ou abaixo. E o Aldebarán-Intasa demostrou que este ano é un dos inimigos a bater na parte alta. Contra a Concentración permanente exhibiu un xogo moi superior en todo o encontro. As estatísticas sinalan maior efectividade en practicamente todos os apartados: foron máis efectivos no saque (tamén en puntos directos), marraron menos en recepción e só se notou unha leve vantaxe no bloqueo para os visitantes. O partido rematou cun resultado de 3-0 (25/21, 25/13 e 25/23) e, ademais, confirma o ollo do club á hora de facer fichaxes, xa que o colocador Andrés Portero volve figurar esta semana no equipo ideal da SM2.
O Aldebarán continúa invicto no grupo A da SM2 -este ano a competición dividiuse en dúas ligas paralelas que confluirán máis adiante- e o sábado viaxa ao sur de Galicia para enfrontarse ao Club Vigo Voleibol, que marcha penúltimo. O partido comezará ás 18.30h. no pavillón municipal de Coia.
